طبيعى ان الواحد يسمع عن آلة حاسبة او حاسب الى لكن اللى فعلا افتكاسة انك تسمع عن سجادة صلاة حاسبة ...ايوة و الله مواطن تونسى اخترع اول سجادة حاسبة للركعات تعمل بإشارات ضوئية لتسجيل عدد الركعات وكمان السجادة السحرية دى هترسل إشارات ضوئية عند الركوع والسجود.. حد شاف اكتر من كده حلاوة..
الاخ حمادى الابيض برر او فسر اختراعه الفظيع ان المصلى عادة يتشكك فى عدد الركعات اللى بيصليها وساعات كمان بيشك اذا كان سجد سجدة واحدة ام سجدتين وده امر بيسبب بلبلة عند المصلى يا حرام,,,الاختراع ده تم اكتشافه من حوالى عامين وسبب ضجة وجدل كبير حوله لكن سرعان ما هدأ الجو مرة اخره ى, ولكن من حوالى يومان الدنيا قامت تانى عندما أعلن أستاذان بجامعة أم القرى أنهما صمما سجادة ذكية تسهل على المسلمين أداء الصلاة، يرافقها جهاز آلي لعد الركعات وأنه يجري حاليا تصنيعه؛ تمهيدا للإعلان عن إطلاقه رسمياً .
السؤال الآن , يا ترى الواحد وهو بيصلى على السجادة الحاسبة دى هيركز فى الصلاة ولا هيفضل يعد الاشارات, واذا كان التركيز من غيرها بيكون يادوب 50% فبالاعتماد عليها أعتقد أنه مش هيكون فى تركيز اصلا , ولو اثبت مخترعو هذه السجادة انها لم ولن تشغل المصلى اثناء اداء فريضته ,فالاكيد أن هذا المصلى هيستسهل الموضوع وهيبطل يحسب عدد الركعات و عدد السجدات التى يؤديها , وبالتالى مش هيكون هناك خشوع فى الصلاة , مش فى اشارات ضوئية يوجع دماغه ليه !!!!!
ولما سألنا دكتور جاد مخلوف استاذ الشريعة بجامعة الازهر عن شرعية السجادة دى قال : انة مفيش مانع شرعى من استخدام السجادة الحاسبة لعدد الركعات لكن اذا تحقق شرط انها لا تشغل المصلى فى صلاته وانه معروف ان الدين يسر وفى حل بسيط لمشكلة نسيان عدد الركعات وهو سجود السهو وان الانسان يكون خاشع اكتر فى الصلاة بحيث يكون متذكر لعدد الركعات وده طبعا اسهل بكتير من اختراع سجادة حاسبة ومن شرائها بمبلغ وقدره .
ارجع واقول ان لو كان الاختراع ده جاء لنا عن طريق الصين كنا قعدنا نندب حظنا ونقول حتى سجادة الصلاة ..هى اه افتكاسة لكن مين عالم يمكن المرة الجاية يخترع مبرد تمرره على اظافرك تعرف انت سبحت كام مرة ,,اقصد يبتكر شىء لمشكلة ليس لها حل فعلا مش حلها يكون موجود من 1400 سنة ...والله اعلم
